Ayodhya Verdict | राममंदिर प्रकरणात स्वामी अविमुक्तेश्वरानंद यांच्या भूमिकेचा दावा; दिग्विजय सिंह यांनी कोर्टातील पानांसह केली 1फेसबुक पोस्ट

नवी दिल्ली | ८.७ | रयत समाचार

(Ayodhya Verdict) भारतीय राष्ट्रीय काँग्रेसचे ज्येष्ठ नेते दिग्विजय सिंह यांनी अयोध्या रामजन्मभूमी बाबरी मशीद वादाशी संबंधित इलाहाबाद उच्च न्यायालयाच्या निर्णयातील काही पाने फेसबुकवर शेअर करत शंकराचार्य स्वामी अविमुक्तेश्वरानंद सरस्वती यांच्या भूमिकेबाबत महत्त्वाचा दावा केला आहे.

(Ayodhya Verdict) सिंह यांनी आपल्या पोस्टमध्ये म्हटले आहे की, इलाहाबाद उच्च न्यायालयाच्या निर्णयात स्वामी अविमुक्तेश्वरानंद सरस्वती यांचा धार्मिक विषयांवरील तज्ज्ञ साक्षीदार (Expert Witness) म्हणून उल्लेख आहे. त्यांनी न्यायालयात सलग एक महिना साक्ष दिली आणि रामजन्मभूमीबाबत विविध हिंदू धर्मग्रंथांच्या आधारे आपले मत मांडले, असा दावा पोस्टमध्ये करण्यात आला.

हे ही वाचा : Ram Mandir Donation | मंदिरच सुरक्षित नाहीत तर आस्था कुठे सुरक्षित?; राममंदिर देणगी चोरीवर शंकराचार्यांचा संतप्त सवाल

(Ayodhya Verdict) पोस्टनुसार, शंकराचार्य स्वामी स्वरूपानंद सरस्वती यांनी स्थापन केलेल्या अखिल भारतीय श्रीरामजन्मभूमी पुनरुद्धार समितीतर्फे न्यायालयीन लढा लढण्यात आला. त्यांच्या वतीने वरिष्ठ वकील पंडित पी. एन. मिश्रा यांनी इलाहाबाद उच्च न्यायालयात सर्वाधिक दिवस युक्तिवाद केल्याचाही उल्लेख करण्यात आला आहे. तसेच सर्वोच्च न्यायालयातील अंतिम सुनावणीतही त्यांनी नऊ दिवस बाजू मांडल्याचा दावा पोस्टमध्ये करण्यात आला.

(Ayodhya Verdict) दिग्विजय सिंह यांनी शेअर केलेल्या निर्णयातील उताऱ्यांमध्ये स्वामी अविमुक्तेश्वरानंद यांचा DW-20/2 या धार्मिक तज्ज्ञ साक्षीदार म्हणून उल्लेख असल्याचे दिसते. त्या उताऱ्यात त्यांनी वाल्मीकी रामायणासह विविध धर्मग्रंथांचा आधार घेत वादग्रस्त जागा भगवान श्रीरामांचे जन्मस्थान असल्याचे प्रतिपादन केल्याची नोंद आहे.

पोस्टमध्ये असेही म्हटले आहे की, शंकराचार्य स्वरूपानंद सरस्वती यांनी १९८९ पासून न्यायालयीन आणि सामाजिक स्तरावर राममंदिरासाठी सातत्याने संघर्ष केला. त्यामुळे आज त्यांच्या भूमिकेवर प्रश्न उपस्थित करणाऱ्यांनी हा इतिहास लक्षात घ्यावा, असे आवाहनही करण्यात आले आहे.

महत्त्वाची नोंद : दिग्विजय सिंह यांनी केलेल्या फेसबुक पोस्टमध्ये मांडलेले दावे त्यांनी शेअर केलेल्या न्यायालयीन दस्तऐवजांच्या आधारे व्यक्त केले आहेत. या दाव्यांबाबत स्वतंत्र न्यायालयीन पडताळणी किंवा संबंधित पक्षांची प्रतिक्रिया या बातमीत उपलब्ध नाही.

History | स्वातंत्र्यप्रेमी महावीर विठोजीराजे होळकरांची एवढी कृर हत्या का? स्मृतिवार्ता, संजय सोनवणी