Shrigonda Court: श्रीगोंदा न्यायालयात राष्ट्रीय लोकअदालतीला उत्स्फूर्त प्रतिसाद; 8 हजार 342 प्रकरणे निकाली

श्रीगोंदा |१२.९ | माधव बनसुडे

Shrigonda Court: श्रीगोंदा येथे शनिवार, दि. १२ सप्टेंबर रोजी राष्ट्रीय लोकअदालतीचे आयोजन करण्यात आले. या लोकअदालतीत विविध प्रकारची प्रलंबित तसेच दाखलपूर्व प्रकरणे सामोपचाराने निकाली काढण्यात आली. एकूण ८ हजार ३४२ प्रकरणांचा निपटारा करण्यात आला असून, त्यातून ५ कोटी १८ लाख ९४ हजार १७१ रुपयांची रक्कम वसूल करण्यात आली.

जिल्हा न्यायालय, श्रीगोंदा येथे आयोजित राष्ट्रीय लोकअदालतीच्या माध्यमातून पक्षकारांना न्यायालयीन प्रक्रियेत लागणारा वेळ, पैसा आणि श्रम वाचविण्याची संधी उपलब्ध झाली. यावेळी जिल्हा न्यायाधीश श्री. डी. पी. शिंगाडे यांनी पक्षकारांनी जास्तीत जास्त प्रकरणे लोकअदालतीमध्ये निकाली काढून या संधीचा लाभ घ्यावा, असे आवाहन केले.

लोकअदालतीमध्ये मोटार अपघात, भू-संपादन, कौटुंबिक वाद, दिवाणी व फौजदारी प्रलंबित प्रकरणे तसेच ग्रामपंचायत, नगरपालिका, बँक आणि महावितरण विभागाशी संबंधित दाखलपूर्व प्रकरणे ठेवण्यात आली होती. परस्पर सहमतीने प्रकरणे निकाली निघाल्यामुळे पक्षकारांना दीर्घकाळ चालणाऱ्या न्यायालयीन प्रक्रियेतून दिलासा मिळाला.

विशेषतः मोटार अपघाताच्या प्रकरणांमध्ये अपघातानंतर उपचारासाठी होणारा रुग्णालयाचा खर्च तसेच बाधित कुटुंबीयांना आर्थिक मदतीची आवश्यकता असते. अशी प्रकरणे लोकअदालतीत सामोपचाराने निकाली निघाल्याने संबंधितांना नुकसानभरपाईची रक्कम लवकर मिळण्यास मदत होते. त्यामुळे पक्षकारांचा आर्थिक व मानसिक त्रास कमी होण्यास हातभार लागतो.

वरिष्ठ न्यायालयाचे न्यायाधीश श्री. ए. एम. मुजावर यांनीही लोकअदालतीमध्ये पक्षकारांच्या तडजोडीने प्रकरणे निकाली काढल्यामुळे वेळ, पैसा व श्रम यांची बचत होत असल्याचे नमूद केले. लोकअदालतीमध्ये निकाली निघालेल्या प्रकरणांबाबत पुढील न्यायालयीन प्रक्रिया कमी होऊन पक्षकारांना मोठा दिलासा मिळतो. त्यामुळे अधिकाधिक पक्षकारांनी सामोपचाराच्या माध्यमातून प्रकरणे निकाली काढण्यासाठी पुढाकार घ्यावा, असे आवाहन करण्यात आले.

या राष्ट्रीय लोकअदालतीसाठी श्रीगोंदा व कर्जत-जामखेड बार असोसिएशनचे पदाधिकारी व मोठ्या संख्येने अधिवक्ते उपस्थित होते. न्यायालयीन अधिकारी, ग्रामविकास विभागातील अधिकारी, ग्रामसेवक, विविध बँकांचे अधिकारी व कर्मचारी, नगरपरिषद अधिकारी व कर्मचारी, महावितरण विभागाचे अधिकारी व कर्मचारी, न्यायालयीन कर्मचारी, पोलीस कर्मचारी तसेच पक्षकारांनीही मोठ्या संख्येने सहभाग घेतला.

८ हजार ३४२ प्रकरणांचा निपटारा

राष्ट्रीय लोकअदालतीत दाखलपूर्व ८ हजार २६५ प्रकरणे निकाली काढण्यात आली. त्यातून १ कोटी ६४ लाख ३४ हजार ६८१ रुपये वसूल करण्यात आले. तसेच दाखल ७७ प्रकरणे निकाली काढण्यात आली असून, त्यातून ३ कोटी ५४ लाख ५९ हजार ४९० रुपये वसूल झाले.

लोकअदालतीच्या माध्यमातून एवढ्या मोठ्या संख्येने प्रकरणे निकाली निघाल्याने ‘समेटातून न्याय’ या संकल्पनेला श्रीगोंदा न्यायालयात चांगला प्रतिसाद मिळाल्याचे चित्र दिसून आले. पक्षकारांनी न्यायालयीन वाद दीर्घकाळ प्रलंबित न ठेवता परस्पर सहमतीने तोडगा काढण्यासाठी लोकअदालतीचा अधिकाधिक लाभ घ्यावा, असे आवाहन यावेळी करण्यात आले.

Observational Short Film | चित्रपटनिर्मिती शिकणाऱ्यांसाठी : निरीक्षणप्रधान लघुपट म्हणजे काय?