कल्याण रोड, शिवाजीनगर आणि गणेशनगरमध्ये अभिषेक कळमकर यांची प्रचार फेरी – विकासाच्या आशेने नागरिकांचा उत्स्फूर्त पाठिंबा

अहमदनगर | प्रतिनिधी

शहरातील कल्याण रोड, शिवाजीनगर, आणि गणेशनगर भागात अभिषेक कळमकर यांच्या प्रचार फेरीला नागरिकांचा उत्स्फूर्त प्रतिसाद मिळाला. फेरी दरम्यान ठिकठिकाणी नागरिकांनी कळमकर यांचे पुष्पहार घालून स्वागत केले आणि “विजय तुमचाच” नारा देत त्यांच्या नेतृत्वावर विश्वास व्यक्त केला. महापौर असताना कळमकर यांनी केलेल्या विकासकामांची नागरिकांनी यावेळी उजळणी केली. परिसरातील समस्यांचे निराकरण करण्याची आणि बदल घडवण्याची अपेक्षा नागरिकांनी यावेळी व्यक्त केली.

कळमकर यांनी प्रचार फेरीदरम्यान प्रत्येक ठिकाणी थांबून नागरिकांशी संवाद साधला आणि त्यांना भेडसावणाऱ्या विविध समस्यांचा आढावा घेतला. नागरिकांनी पाणीपुरवठ्याच्या अपुऱ्या सोयी, खराब रस्ते, कचरा व्यवस्थापनातील उणीवा, तसेच सार्वजनिक सुविधांचा अभाव या समस्या मांडल्या. “गेल्या अनेक वर्षांपासून आम्हाला विकासाची वचने मिळत आहेत, परंतु प्रत्यक्षात काहीच बदल झालेला नाही,” असे नाराज नागरिकांनी सांगितले. या समस्यांवर त्वरित उपाय करण्याचे आश्वासन कळमकर यांनी दिले.

“या भागाला संपूर्णपणे विकसित करण्यासाठी मी कटिबद्ध आहे. निवडून आल्यास या परिसरातील मूलभूत समस्यांवर लक्ष केंद्रित करून, प्रत्येक समस्येवर योग्य ती कार्यवाही केली जाईल,” असे आश्वासन कळमकर यांनी दिले. विशेषतः पाणीपुरवठ्याची समस्या सोडवणे, रस्त्यांची दुरुस्ती, तसेच स्वच्छता आणि सार्वजनिक आरोग्य सुविधा मजबूत करणे हे त्यांच्या प्राधान्यक्रमात असल्याचे त्यांनी नमूद केले.

या प्रचारफेरीत महाविकास आघाडीचे पदाधिकारी, स्थानिक कार्यकर्ते, तसेच तरुण मित्र मंडळाचे सदस्य मोठ्या संख्येने सहभागी झाले होते, ज्यामुळे या फेरीला विशेष रंगत आली. स्थानिक तरुणांनी कळमकर यांच्या कार्यपद्धतीवर विश्वास व्यक्त केला आणि त्यांच्या विकासाच्या वचनांना पाठिंबा देण्याची तयारी दर्शवली.

नगर शहरातील या भागातील नागरिकांनी कळमकर यांना संधी देण्याचा शब्द दिला आहे. “यंदा बदल घडविण्याचा संकल्प आहे. विकास हाच आमचा मुख्य मुद्दा असून, या भागातील अन्याय दूर करण्यासाठी आम्ही अभिषेक कळमकर यांनाच निवडून देणार,” असा ठाम निर्धार नागरिकांनी व्यक्त केला.

महत्त्वाच्या मुद्द्यांवर लक्ष केंद्रित: नागरिकांचा पाठिंबा मिळवत कळमकर यांनी जाहीर केले की, विकासाच्या दिशेने ठोस पावले उचलण्यात येतील आणि या परिसरातील नागरिकांचे जीवनमान सुधारण्यासाठी सर्वतोपरी प्रयत्न केले जातील.