World news | अण्वस्त्रांची धमकी थांबवा, शस्त्रास्त्रांची शर्यत रोखा- अँटोनियो गुटेरेश; यूएन महासचिवांची नेत्यांना थेट हाक

आंतरराष्ट्रीय वृत्त | ६.३ | रयत समाचार

(World news) जगभर वाढत चाललेल्या तणावाच्या पार्श्वभूमीवर संयुक्त राष्ट्रांचे महासचिव अँटोनियो गुटेरेश यांनी जागतिक नेत्यांना गंभीर इशारा देत अण्वस्त्रांच्या धोक्याबाबत सावध राहण्याचे आवाहन केले आहे. गुरुवारी साजऱ्या करण्यात आलेल्या निरस्त्रीकरण आणि अप्रसार जागरूकता आंतरराष्ट्रीय दिनानिमित्त त्यांनी जगातील देशांना शस्त्रास्त्रांच्या स्पर्धेपासून मागे हटण्याची गरज अधोरेखित केली.

(World news) गुटेरेश यांनी स्पष्ट शब्दांत सांगितले, अण्वस्त्रांची धमकी आणि वाढती शस्त्रास्त्रांची शर्यत मानवजातीसाठी अत्यंत धोकादायक ठरू शकते. त्यामुळे जागतिक नेत्यांनी तातडीने संयम दाखवत या धोकादायक परिस्थितीतून मागे हटावे.

(World news) ते पुढे म्हणाले, आज जगातील शांततेचे स्वप्न धोक्यात आले आहे. वाढत्या संघर्षांमुळे अण्वस्त्रांच्या वापराचा धोका अधिक गंभीर बनत आहे. तथापि, परिस्थिती अजूनही नियंत्रणात आणता येऊ शकते, असा आशावादही त्यांनी व्यक्त केला. आपण सर्वांनी मिळून प्रयत्न केले तर ही संभाव्य तबाही थांबवू शकतो आणि सर्वांसाठी सुरक्षित व शांततामय जग निर्माण करू शकतो, असे ते म्हणाले.

जगातील अनेक भागांमध्ये वाढत्या संघर्षांमुळे अण्वस्त्रांचा प्रश्न पुन्हा एकदा चर्चेत आला आहे. त्यामुळे जागतिक पातळीवर निरस्त्रीकरणाच्या प्रयत्नांना गती देणे आणि अण्वस्त्रांचा प्रसार रोखणे ही काळाची गरज असल्याचेही गुटेरेश यांनी अधोरेखित केले.