श्रीगोंदा | २७ ऑक्टोबर | माधव बनसुडे
Rip News पिकअप चालकाने अचानक दरवाजा उघडल्यामुळे दुचाकीला धक्का लागून अपघातात गंभीर जखमी होऊन प्रसिद्ध कृषी व्यावसायिक ज्ञानेश्वर परसराम आगलावे यांचे अपघाती निधन झाले. त्यांचे वय ६८ वर्षे होते. त्यांच्या पश्चात मुलगा दोन मुली पत्नी नातवंडे असा मोठा परिवार आहे.
राहाता तालुक्यातील सावळविहीर बुद्रुक हे मुळ गाव असणारे आगलावे हे श्रीगोंद्यात स्थायिक झाले होते. ते कृषी सहाय्यक म्हणून येथे कार्यरत होते. त्यांनी सेवानिवृत्तीनंतर श्रीगोंद्यात कृषीसेवा केंद्राचा व्यवसाय सुरू केला.
काल शुक्रवारी सकाळी साडेअकरा वाजण्याच्या सुमारास आगलावे हे आपल्या दुचाकीवरून शहरातील शनीचौक ते छत्रपती शिवाजी महाराज चौक (होनराव चौक) रस्त्याने जात असताना जैन मंदिरासमोर रस्त्यावर उभ्या असलेल्या पिकअप चालकाने पाठीमागे न बघता अचानक गाडीचा दरवाजा उघडला. त्यामुळे आगलावे यांच्या दुचाकीला दरवाजाचा धक्का लागून ते खाली पडले. त्यात त्यांना गंभीर मार लागला. आजूबाजूच्या सजग नागरिकांनी त्यांना तत्काळ श्रीगोंद्यातील खाजगी रुग्णालयात दाखल केले परंतु गंभीर दुखापत झाल्यामुळे ज्ञानेश्वर आगलावे यांना अहमदनगर येथील खासगी रुग्णालयात उपचारासाठी पाठवण्यात आले. तिथे उपचारादरम्यान त्यांची प्राणज्योत मालवली.
आगलावे यांच्या निधनाबद्दल श्रीगोंद्यातील सर्व कृषी व्यवसायिकांसह नागरिकांमधून हळहळ व्यक्त होत आहे.
About The Author
