मुंबई | १४.११ | गुरुदत्त वाकदेकर
(Education) सेवा मंडळ एज्युकेशन सोसायटीच्या एम.पी. शाह कनिष्ठ कला आणि वाणिज्य महिला महाविद्यालय, माटुंगा येथे “ग्रीन वेव्ह” या नावाने भव्य आंतरशालेय आणि आंतरमहाविद्यालयीन पर्यावरण महोत्सवाचे आयोजन करण्यात आले. विद्यार्थ्यांमध्ये पर्यावरणाविषयी जागरूकता आणि शाश्वत विचारसरणी विकसित करणे, तसेच कला, संस्कृती आणि विज्ञान यांच्या संगमातून जबाबदार जीवनशैलीचा संदेश पसरवणे, हा या महोत्सवाचा मुख्य उद्देश होता.
Waa (Education) महोत्सवाचे उद्घाटन सेवा मंडळ एज्युकेशन सोसायटीच्या कार्यकारी सचिव डॉ. शिल्पा चरणकर आणि महाविद्यालयाच्या प्राचार्य डॉ. अर्चना पत्की यांच्या हस्ते संपन्न झाले. कार्यक्रमास उपप्राचार्या अल्पा दोशी, पर्यवेक्षिका वर्षा पालकर, राजेश्वरी करंजकर तसेच पर्यावरणशास्त्र विभागप्रमुख रीता खडगी आणि विद्यार्थी परिषद प्रमुख श्रुती राव उपस्थित होत्या. यावेळी आदिवासी नृत्य (भूमी तांडव) आणि प्रतिकृती प्रदर्शन आयोजित करण्यात आले, ज्यांना शालेय आणि महाविद्यालयीन विद्यार्थ्यांचा उत्स्फूर्त प्रतिसाद लाभला. या दोन प्रमुख स्पर्धांनी उत्साह निर्माण झाला.
(Education) आदिवासी नृत्य स्पर्धेत विद्यार्थ्यांनी भारताच्या समृद्ध आदिवासी परंपरेचे आणि निसर्गाशी असलेल्या घट्ट नात्याचे उत्कृष्ट दर्शन घडवले. पारंपरिक वेशभूषा, तालबद्ध हालचाली आणि अभिव्यक्तीपूर्ण सादरीकरणातून ‘मानव आणि निसर्गातील समरसतेचा संदेश’ प्रभावीपणे मांडण्यात आला. प्रतिकृती प्रदर्शन स्पर्धेत विद्यार्थ्यांनी पर्यावरणाशी संबंधित आव्हानांवर शाश्वत उपाय दर्शवणाऱ्या अभिनव प्रतिकृती (कार्यरत व स्थिर) सादर केल्या. सर्व प्रतिकृतींमध्ये जैवविघटनशील साहित्याचा वापर करण्यास विशेष भर देण्यात आला होता, ज्यातून विद्यार्थ्यांच्या सृजनशीलता, जागरूकता आणि वैज्ञानिक दृष्टीकोनाचे दर्शन घडले.
ग्रीन वेव्ह पर्यावरण महोत्सवात १५ शाळा आणि कनिष्ठ महाविद्यालयांनी सहभाग नोंदवला. दोन्ही स्पर्धांच्या विजेत्यांना पारितोषिके आणि रोख रक्कम देऊन गौरविण्यात आले, तर सर्व सहभागींना प्रमाणपत्रे देण्यात आली. उत्साहपूर्ण वातावरणात पार पडलेल्या महोत्सवाने विद्यार्थ्यांना पर्यावरण संवर्धनाची नवी प्रेरणा दिली आणि एक प्रभावी संदेश दिला तो म्हणजे ‘पृथ्वीसाठी नृत्य करा, हिरवळीसाठी उभे राहा’
