(Literature) मराठी भाषेतून विज्ञानाचा प्रसार करणे आणि समाजातील अंधश्रद्धा दूर करणे हे काम मराठी विज्ञान परिषद गेली अनेक वर्षे करीत आहे. ‘मूलद्रव्यांच्या जादुई दुनियेत’ या पुस्तकाचा प्रकाशन समारंभ हा त्याच प्रयत्नांचा भाग आहे,” असे प्रतिपादन मराठी विज्ञान परिषद, ठाणे विभागाचे अध्यक्ष दा. कृ. सोमण यांनी केले.
(Literature) मराठी विज्ञान परिषद, ठाणे विभाग आणि मराठा मंडळ, ठाणे यांच्या संयुक्त विद्यमाने हेमंत साने लिखित आणि लोकवाङ्मय गृह प्रकाशित ‘मूलद्रव्यांच्या जादुई दुनियेत’ या पुस्तकाचा प्रकाशन समारंभ नुकताच उत्साहात पार पडला. यावेळी ज्येष्ठ विज्ञान प्रसारक व लेखिका डॉ. मानसी राज्याध्यक्ष, प्राध्यापक नामदेव मांडगे, साहित्य अकादमीचे सदस्य डॉ. नरेंद्र पाठक, तसेच लोकवाङ्मय गृह प्रकाशनचे संपादक अक्षय शिंपी प्रमुख पाहुणे म्हणून उपस्थित होते. मराठा मंडळ ठाणेचे अध्यक्ष सुरेश सुर्वे आणि सरचिटणीस राजेंद्र साळवी यांनी आयोजक म्हणून सर्व मान्यवरांचे स्वागत केले. कार्यक्रमाची सुरुवात सतीश सोळांकूरकर आणि शंकर वैद्य यांनी लिहिलेल्या विज्ञानगीताने झाली.
(Literature) या पुस्तकात आवर्तसारणीतील ११८ मूलद्रव्यांची माहिती ग्रामीण विद्यार्थ्यांनाही समजेल अशा सोप्या मराठी भाषेत मांडण्यात आली आहे. त्यासोबत आवश्यक वैज्ञानिक व अभियांत्रिकी संकल्पनाही स्पष्ट केल्या आहेत. पुस्तकातील माहिती अचूक राहावी आणि परिभाषा विद्यार्थ्यांना समजावी यासाठी अनेक तज्ज्ञांचे मार्गदर्शन घेतल्याचे लेखक हेमंत साने यांनी सांगितले. पुस्तकाला डॉ. मानसी राज्याध्यक्ष यांची प्रस्तावना असून, पद्मविभूषण डॉ. रघुनाथ माशेलकर यांचे ब्लर्ब लाभले आहे. मुखपृष्ठाची रचना गायक, संगीतकार व चित्रकार मिलिंद जोशी यांनी केली आहे.
पुस्तकाचे प्रकाशन सर्व मान्यवरांच्या हस्ते करण्यात आले. या वेळी समीर साने, विद्यालंकार घारपुरे, अरूण वेळासकर आणि सुरेश जंगले यांचा विशेष सत्कार करण्यात आला. डॉ. मानसी राज्याध्यक्ष यांनी पॉवर पॉईंट सादरीकरणातून आवर्तसारणीचे महत्त्व उलगडले. हेमंत साने यांच्या लेखनातील लयबद्धतेमुळे विज्ञानाच्या पुस्तकातील माहिती रसपूर्ण वाटते, असे त्यांनी नमूद केले.
डॉ. नरेंद्र पाठक यांनी विज्ञानविषयक साहित्य मराठीत निर्माण होणे ही काळाची गरज असल्याचे सांगितले. प्राध्यापक नामदेव मांडगे यांनी दिमित्री मेंडेलिव्ह यांच्या कार्याचा उल्लेख करून ८ फेब्रुवारीला त्यांचा वाढदिवस आणि ९ फेब्रुवारीला या पुस्तकाचे प्रकाशन हा योगायोग असल्याचे सांगितले. मराठा मंडळ ठाणेचे अध्यक्ष सुरेश सुर्वे यांनी आभारप्रदर्शन केले. सूत्रसंचालन नीता माळी यांनी केले.
कार्यक्रमाला रंगतज्ज्ञ विलास गुप्ते, अभिनेत्री संपदा जोगळेकर, लोककला प्रसारक शैला खांडगे, कवी सतीश सोळांकूरकर, पत्रकार शिवाजी गावडे यांच्यासह अनेक मान्यवर उपस्थित होते. ग्रामीण भागातील शिक्षकांच्या प्रतिक्रिया व्हिडिओद्वारे दाखवण्यात आल्या. कार्यक्रमाच्या शेवटी रसिकांनी उत्साहाने पुस्तक खरेदी केली.
