फक्त आपला लोकसभा मतदारसंघ आणि शिवसेनेसाठीच काम करण्याचे ज्युनिअर शिंदे यांचे सुतोवाच
मुंबई | २ डिसेंबर | गुरुदत्त वाकदेकर
Mumbai News महाराष्ट्राच्या मुख्यमंत्रिपदाचा तिढा कायम असतानाच काळजीवाहू मुख्यमंत्री एकनाथ शिंदे यांचे पुत्र आणि शिवसेनेचे कल्याणमधील खासदार श्रीकांत शिंदे यांनी नव्या महायुती सरकारमध्ये उपमुख्यमंत्री होण्याच्या शक्यतांना ‘निराधार’ ठरवून फेटाळून लावले.
Mumbai News ”मी उपमुख्यमंत्री होणार या वृत्तावर गेल्या दोन दिवसांपासून प्रश्नचिन्ह निर्माण झाले आहे. खरे तर त्यात कोणतेही तथ्य नाही आणि माझ्या उपमुख्यमंत्री पदाबाबतच्या सर्व बातम्या निराधार आहेत, असे त्यांनी समाजमाध्यमावरील पोस्टमध्ये म्हटले.
Mumbai News शिंदे यांनी नमूद केले की, महाआघाडी सरकारचा शपथविधी सोहळा होण्यासाठी थोडा उशीर झाल्यामुळे बरीच चर्चा आणि अफवा पसरल्या आहेत. ते म्हणाले, काळजीवाहू मुख्यमंत्री प्रकृती अस्वास्थ्यामुळे विश्रांती घेण्यासाठी दोन दिवस त्यांच्या गावी गेले होते. त्यामुळे अफवांना पेव फुटले आहे.
लोकसभा निवडणुकीनंतरही केंद्र सरकारमध्ये मंत्री होण्याची संधी असल्याचे ते म्हणाले. पण मी पक्ष संघटनेसाठी काम करण्याचा विचार केला आणि तेव्हाही मंत्रिपद नाकारले. मला सत्तेत पदाची इच्छा नाही. मी पुन्हा एकदा स्पष्ट करतो की, मी राज्यातील कोणत्याही मंत्रिपदाच्या शर्यतीत नाही. मी फक्त माझा लोकसभा मतदारसंघ आणि शिवसेनेसाठीच काम करणार आहे.
शिंदे म्हणाले, प्रसारमाध्यमांमधला उत्साह आणि स्पर्धा आपल्याला समजत असतानाच त्यांनी वार्तांकन करताना वास्तवाकडे पाठ फिरवू नये, अशी विनंती केली. “माझ्याबद्दलच्या चर्चा आता तरी थांबतील अशी माफक आशा आहे,” असेही ते पुढे म्हणाले.
महाराष्ट्रातील विधानसभा निवडणुकीचा निकाल २३ नोव्हेंबर रोजी जाहीर करण्यात आला, ज्यात भाजप, शिवसेना (शिंदे) आणि राष्ट्रवादी काँग्रेस पक्ष (अजित पवार) यांचा समावेश असलेल्या महायुती आघाडीने दणदणीत विजय मिळवला. मात्र, आपल्या घटक पक्षांमध्ये चर्चा बैठका होऊनही महायुतीने अद्याप मुख्यमंत्रिपदाचा उमेदवार निश्चित केलेला नाही.
हे ही वाचा : मराठी विश्वकोश येथे वाचा
Contents
About The Author
Discover more from Rayat Samachar
Subscribe to get the latest posts sent to your email.
