मुंबई | गुरुदत्त वाकदेकर
T20 World Cup : आयसीसी पुरुष टी–२० विश्वचषक २०२६ मधील चौदाव्या सामन्यात गट ब मध्ये ऑस्ट्रेलियाने आयर्लंडचा ६७ धावांनी पराभव करत आपले वर्चस्व सिद्ध केले. आर. प्रेमदासा स्टेडियमवर झालेल्या या सामन्यात ऑस्ट्रेलियाच्या गोलंदाजांनी प्रभावी मारा करत आयर्लंडचा डाव अवघ्या १६.५ षटकांत गुंडाळला.
प्रथम फलंदाजी करत ऑस्ट्रेलियाने २० षटकांत ६ गडी गमावून १८२ धावा केल्या. जोश इंग्लिसने १७ चेंडूंमध्ये ३७ धावांची तुफानी खेळी केली. मॅट रेनशॉने संयमी ३७ धावा जोडल्या. मार्कस स्टॉयनिसने २९ चेंडूंमध्ये ४५ धावांची आक्रमक खेळी साकारली. अखेरच्या षटकांत कूपर कॉनॉली आणि झेवियर बार्टलेट यांनी झटपट धावा करत संघाची धावसंख्या भक्कम केली. आयर्लंडकडून मार्क अडायरने २, तर जॉर्ज डॉकरेल, हॅरी टेक्टर आणि मॅथ्यू हम्फ्रीज यांनी प्रत्येकी १ बळी घेतला.
१८३ धावांच्या लक्ष्याचा पाठलाग करताना आयर्लंडची फलंदाजी पूर्णतः कोलमडली. नॅथन एलिस आणि अॅडम झाम्पा यांच्या अचूक गोलंदाजीसमोर आयर्लंडचा डाव १६.५ षटकांत ११५ धावांत आटोपला. जॉर्ज डॉकरेलने २९ चेंडूंमध्ये ४१ धावा करत झुंज दिली. लॉर्कन टकरने २४, तर मार्क अडायरने १२ धावा केल्या. मात्र अन्य फलंदाज अपयशी ठरले.
नॅथन एलिसने ३.५ षटकांत केवळ १२ धावा देत ४ बळी घेतले. अॅडम झाम्पाने ४ षटकांत २३ धावांत ४ बळी घेत आयर्लंडचा कणा मोडला. त्यांच्या भेदक माऱ्यामुळे ऑस्ट्रेलियाने मोठा विजय नोंदवला. उत्कृष्ट गोलंदाजीसाठी नॅथन एलिसला सामनावीर पुरस्काराने गौरवण्यात आले.
या विजयासह ऑस्ट्रेलियाने गट ब मधील आपली आघाडी अधिक मजबूत केली असून स्पर्धेतील विजेतेपदाच्या शर्यतीत आपली दावेदारी अधिक भक्कम केली आहे.
हे हि वाचा : India news | कहाणी गंगाबाईंच्या ‘मिथिला व मैथिल राजवंशाचा इतिहास’ पुस्तकाची; ईसमाद प्रकाशनचे 1 पहिले मराठी पुस्तक
Discover more from Rayat Samachar
Subscribe to get the latest posts sent to your email.
